Agellus patrui mei in Cantio est, inter Dubras et Rutupias situs. Dubrae et Rutupiae oppida antiqua sunt. Multa sunt monumenta antiqua in Britannia, multa vestigia Romanorum. Reliquiae villarum, oppidorum, amphitheatrorum Romanorum hodie exstant. Multae viae Romanae in Britannia sunt. In Cantio est via Romana inter Rutupias et Londinium. Solum Britannicum multos nummos aureos, argenteos, aeneos et Britannorum et Romanorum occultat. Rusticis nummi saepe sunt causa lucri, cum arant vel fundamenta aedificiorum antiquorum excavant. Nam nummos antiquos magno pretio venumdant. Patruo meo magnus numerus est nummorum Romanorum.
Inter ferias commentarios meos de vita mea scriptito. Dubras saepe visitamus; nam oppidum non procul abest. Super oppidum est castellum magnum; in castello est specula antiqua. Muri speculae alti et lati sunt. Quondam erat pharus Romanorum. Prope speculam est aedificium consecratum. Iam secundo saeculo post Christum natum basilica Christiana erat.
Castellum in promunturio orae maritimae stat. Post castellum sunt clivi graminei et lati. Ex castello fretum Gallicum spectas. Ante oculos sunt vela alba multorum navigiorum; navigia sunt Britannica, Francogallica, Germanica, Belgica. Nonnulla ex navigiis Britannicis «castella» nominata sunt. Littera C in signo est. «Castella» in Africam Meridianam navigant, ubi patria mea est.